Հիմա էլ գիտավանի բնակիչներին հյուր եկող երևանցիները զարմանում են, թե ինչպես է պահպանվել այս օրերի երևանյան տեսարաններից այդքան տարբերվող այդ կանաչ օազիսը: Ամառվա կիզիչ տապին բազմամյա ծառերի հզոր սաղարթը պատսպարում է անցորդներին արևի այրող ճառագայթներից: Իսկ հիմա, երբ դրսում աշուն է, և բնության ներկապնակը երանգավորվել է մի աննախադեպ շռայլությամբ, գիտավանը, հիրավի, արժանի է թվում լավագույն գեղանկարիչների վրձնին:
Բայց թե դա ռոմանտիկների համար է: Իսկ ռեալիստներն այլ կերպ են մտածում: Եվ գործու’մ: Նայեք այս նկարները: Միայն թե չասեք` դա ընդամենը մի քանի ծառ է: Այդ մի քանի ծառերն առնվազն 30 սմ տրամագծով բներ ունեն: Քանի՞ տարի է անհրաժեշտ, որ նման ծառ աճի: Բայց այս ծառերը, դժբախտաբար, աճում էին Հալաբյան փողոցի վրա վերջերս կառուցված «Կլայկ» կահույքի խանութի դիմաց եւ իրենց սաղարթով փակում էին խանութի ճակատամասը: Խանութի տերերն էլ ծառերին «չներեցին» այդ հանդգնությունը. նախ բոլոր ճյուղերը իսպառ հատեցին, ապա հարակից տարածքը ասֆալտապատեցին` այնպե¢ս, որ ոչ մի կաթիլ ջուր չհասնի հիմնահատակ սաղարթահատված ծառերի արմատներին: Իսկ գարնանը հանգիստ կարելի է սղոցել նաև բները, ավելի ճիշտ` այն գերանները, որ մնացել են կանգնած` ի հիշատակ երբեմնի ծառերի:
Հետո էլ ասում են, թե իսկական հայը նա է, ով տուն է կառուցում, որդի է մեծացնում ու ծառ է տնկում: Ի՞նչ է, այս աշխարհի այսպես կոչված հզորներն ամբողջովին խմբագրե՞լ են այդ ասացվածքը:
Ամալյա ՊողոսյանՖիզիկայի գիտավանի բնակչուհի
Комментариев нет:
Отправить комментарий