ԹԵՂՈՒՏԻ ՀԱՄԱՐ ՍՏՈՐԱԳՐԵԼ ԵՆ ՆԱԵՎ ԱՌԱՋԻՆ ՏԻԿԻՆՆԵՐԸ

Թեղուտի անտառների պաշտպանության հարցով այսօր լրագրողներին են հանդիպել ԱԺ պատգամավոր Զարուհի Փոստանջյանը, փաստաբան Հայկ Ալումյանը, Թրանսփարենսի ինթերնեյշնլ կենտրոնի ներկայացուցիչ Սոնա Այվազյանը և Էկո Դար ՀԿ նախագահ Հրայր Սավզյանը: Սոնա Այվազյանը նշել է, որ իրենք հայց են ներկայացնելու դատարան, և հայցը համարյա ամբողջությամբ պատրաստ է: Փաստաբան Հայկ Ալումյանը պարզաբանել է, որ դեռևս 2001թ. ընդունվել են մի շարք վարչական ակտեր, որոնց ընդունման կարգի մեջ ներպետական, միջազգային պայմանագրերի և սահմանադրության խախտումներ են կատարվել: Հրայր Սավզյանը նշել է, որ իրենք մոտ 5000 ստորագրություն են հավաքել Թեղուտի անտառների պաշտպանության համար: Մարդիկ սիրով ստորագրում են, ասել է Սավզյանը: Հունիսի 5-ը շրջակա միջավայրի պաշտպանության օրն է, և այդ օրը երթ է կազմակերպվելու, թռուցիկներ են բաժանվելու: Սավզյանը ավելացրել է, որ ստորագրությանն են միացել նաև նախկին և ներկա առաջին տիկինները` Բելլա Քոչարյանը և Ռիտա Սարգսյանը: Հավաքված ստորագրություններն ուղարկվելու են նախագահին, վարչապետին, ԱԺ նախագահին: Իրենք դիմել են նաև ՎՏԲ բանկի Ռուսաստանի տնօրենին, սակայն պատասխան չեն ստացել: Հիշեցնենք, որ ՎՏԲ բանկը պետք է 280 մլն դոլարի վարկ տրամադրեր հանքավայրի շահագործման համար: ԱԺ պատգամավոր Զարուհի Փոստանջյանն էլ գտնում է, որ եթե շահագործվի Թեղուտի հանքավայրը, կշահագործվեն նաև ուրանի հանքավայրերը, որը մահացու է պետության և ժողովրդի համար: Եթե մեր դատարաններում չլուծվի հարցը, իրենք դիմելու են նաև միջազգային դատարաններ, ասել է պատգամավորը: Հայցադիմումի պահանջն էլ լինելու է վարչական ակտերը անվավեր ճանաչելը: Ի դեպ, ասուլիսին ներկա է եղել Թեղուտի հանքավայրը շահագործող ընկերության ներկայացուցիչը, ով դուրս գալով ասուլիսից, իր հետեւից գնացած լրագրողներին ասել է, որ 357 հեկտար անտառը, որ հատվելու է, փոխարենը կրկնակին տնկվելու է ողջ Հայաստանում: Նա հակաճառել է Հայկ Ալումյանին, նշելով, որ ակտերի առումով խախտումներ չեն եղել:

lragir.am