Կառավարությունը 10 միլիոն դոլարին համարժեք դրամի չափով բյուջետային վարկ է տրամադրում Զանգեզուրի պղնձամոլիբդենային կոմբինատին

Հայաստանի կառավարության երեկվա նիստում որոշվեց 10 միլիոն դոլարին համարժեք դրամի չափով բյուջետային վարկ տրամադրել Զանգեզուրի պղնձամոլիբդենային կոմբինատին:ՙ

Զանգեզուրի պղնձամոլիբդենային կոմբինատը ամբողջ հզորությամբ աշխատելու է մոտակա երեք տարիների ընթացքում՚, - ասաց վարչապետ Տիգրան Սարգսյանը: - ՙ

Երկրորդ, 50 արբանյակային ձեռնարկություններ, որտեղ ներգրավված են 2 հազար աշխատող, նույնպես երաշխավորված են լինելու, որ պահպանելու են իրենց աշխատատեղերը:

Երրորդը, արտադրողականությունը Զանգեզուրի պղնձամոլիբդենային կոմբինատի առնվազն 30 տոկոսով ավելանալու է:

Կոմբինատի տնօրեն Մաքսիմ Հակոբյանը կառավարության նիստից հետո լրագրողներին ասաց. - ՙՏեսնում եք, պետությունը մեզ ձեռք է մեկնում՚:

Նա նշեց, որ միջազգային շուկայում պղնձի գները, իհարկե, ազդել են ձեռնարկության շահույթի ծավալների վրա. - ՙԵթե մենք պետք է մի քանի տասնյակ միլիոն դոլարների եկամուտ ունենայինք, շահույթ ունենայինք, այսօր, բնական է, մի քանի մատերի վրա պետք է հաշվել. այդքան շահույթ պետք է ունենանք՚:

Հարցին, թե ինչն է պատճառը, որ նույն պայմաններում շարունակում է աշխատել Քաջարանում գտնվող [Զանգեզուրի] կոմբինատը, փոխարենը գործազրկության պատճառ են հանդիսանում Կապանի եւ Ագարակի կոմբինատները, Հակոբյանը արձագանքեց.

- ՙԻրավունք չունեն չաշխատելու: 7-8 տարի առաջ այդ երկու ձեռնարկությունները մենք մեր աշխատակիցներով ենք վերականգնել եւ ապացուցել բոլորին, որ այս ձեռնարկությունները կարող են աշխատել՚:Կապանի քաղաքապետը, ի դեպ, օրերս հայտարարել էր, թե Կապանի կոմբինատի աշխատանքը դադարեցվելու է փետրվարի 19-ից: Կոմբինատի գլխավոր տնօրենը, ինչպես հայտնի դարձավ ՙԱզատություն՚ ռադիոկայանին, երեկ ուշ երեկոյան ՙինտերնետային կապով քննարկում էր ծավալելու Կանադայում գտնվող սեփականատերերի հետ՚: Արդյունքը հստակ կլինի այսօր:Ըստ ՙԱզատություն՚ ռադիոկայանի տեղեկությունների, շաբաթասկզին Հայաստան է ժամանել Ագարակի պղնձամոլիբդենային կոմբինատի սեփականատերը` հակաճգնաժամային ելքեր գտնելու, վարկ խնդրելու նպատակով:

Անուշ Մարտիրոսյան

http://azatutyun.am/armeniareport/report/ar/2009/02/51EE4161-4C78-4691-BAA1-C3F111CBA46E.ASP