Դեբեդ գետից վերցված ջրերի փորձանմուշներում եւ Ալավերդի քաղաքի կողքին տեղակայված, այսպես կոչված, Մադանի գերեզմանոցի տարածքից վերցված օդի փորձանմուշներում մկնդեղ չի հայտնաբերվել: Նման պատասխան է տվել Հայաստանի փրկարար ծառայությունը Ալավերդու Օրհուս կենտրոնի հարցմանը՝ հղում անելով ՀՀ առողջապահության նախարարության պետական հիգիենիկ եւ հակահամաճարակային տեսչության «Լոռու մարզային ՓԿ» ՊՈԱԿ-ի կողմից անցկացված վերլուծության արդյունքների վրա:
Մադանի գերեզմանոցի վիճակի համար իր անհանգստությունն Ալավերդու Օրհուս կենտրոնը հիմնավորում է Ալավերդու պղնձամոլիբդենային կոմբինատի նախկին եւ ներկայիս աշխատակիցների տրամադրած տեղեկություններով: Նրանք պնդում են, որ գերեզմանոցի տարածքում թաղված են կոմբինատի՝ մկնդեղ պարունակող թափոնները: Նախկինում մկնդեղն օգտագործվում էր սեւ պղնձի արտադրության տեխնոլոգիական ցիկլում: Հետագայում այդ օղակը ցիկլից հանվեց, բայց գերեզմանոցը մնաց: Տեղի բնակիչները նաեւ պնդում են, որ գերեզմանոցում թաղված են կոմբինատի լաբորատոր թափոններ պարունակող կապրոնե տարաներ:
Էկոլոգների կարծիքով՝ գերեզմանոցի վիճակը անհանգստություն է ներշնչում եւ ենթակա է ստուգման ու մոնիտորինգի՝ հաշվի առնելով մոտակայքում բնակվող մարդկանց առողջության եւ շրջակա միջավայրի համար ռիսկերը:
Ինչպես «ԷկոԼուր»-ին հայտնի դարձավ, Շրջակա միջավայրի վրա ազդեցության մոնիտորինգի կենտրոնը ՀՀ բնապահպանության նախարարի հանձնարարությամբ տվյալ խնդրի սեփական ուսումնասիրությունն է անցկացնում եւ արդյունքները կներկայացնի մոտ ժամանակներս:
Комментариев нет:
Отправить комментарий